Mu rwego rwo gukemura impungenge z’abarimu ku bijyanye n’imitangire y’akazi n’imyimukire, Ikigo cy’Igihugu gishinzwe Uburezi bw’Ibanze (REB) cyatangaje ibisobanuro birambuye kuri gahunda yifashisha ikoranabuhanga mu kwimura no gushyira abarimu mu myanya binyuze muri Teachers Management Information System (TMIS). Ibi byabereye mu biganiro byabaye ku wa 31 Nyakanga i Kigali, byitabiriwe n’abarimu n’abayobozi mu nzego z’uburezi hagamijwe gukemura ibibazo no kongera icyizere mu bunyamabanga bwa REB.
Uko TMIS ikora mu kwimura abarimu
REB yasobanuye ko buri mwarimu usaba kwimurwa agomba kubinyuza kuri TMIS, urubuga rukoresha ikoranabuhanga rushinzwe gucunga amakuru y’abarimu. Aha ni ho basaba kwimurwa banashyiraho ibimenyetso bifatika by’impamvu zibibatera, maze hakagenzurwa niba hari imyanya iboneka ishingiye ku mashami abarimu bigisha n’aho bifuza kujya.
REB yagaragaje ko kwimura umwarimu bikorwa gusa iyo habonetse umwanya uhuje n’icyo yigisha aho yifuza kujya. Nta mwarimu woherezwa ngo ahabwe umwanya udahari kuko ibyo byaba ari ugukora akazi kinyuranyije n’amategeko.
Impungenge z’abarimu n’imbogamizi zihari
Bamwe mu barimu bagaragaje akababaro kabo batewe n’uko bamaze igihe basabye kwimurwa ariko ntibemererwe, cyangwa bakimurirwa kure y’ingo zabo. REB yemeye ko iki kibazo gihari, cyane cyane bitewe n’uko abarimu benshi bifuza kujya kwigisha mu mijyi, mu gihe abifuza kujya mu cyaro ari bake cyane.
Urugero rwatanzwe ni urw’akarere ka Rusizi aho 252 basabye kwimuka bava muri ako karere, ariko abifuza kujyayo ari bake cyane, bigatuma haboneka icyuho cy’abarimu mu mashuri yo mu bice by’icyaro.
REB ishaka gukemura ibibazo binyuze mu mucyo
Abayobozi ba REB bavuze ko iyi gahunda ikoresha ikoranabuhanga igamije gusaranganya abarimu mu buryo burambye kandi bunoze. Abarimu bujuje ibisabwa bashyirwa ku rutonde bategereje imyanya, ariko bagashyirwa mu myanya gusa iyo habonetse aho bashobora kujya hahuye n’ubumenyi bafite.
Mu rwego rwo gusobanura imiterere y’iki kibazo, REB yagarutse ku mibare y’umwaka ushize wa 2024:
- Abarimu 2,235 basabye kwimurwa bajya mu yandi turere hagati ya Nyakanga na Kanama.
- Muri bo, 1,226 ni bo bujuje ibisabwa, ariko 751 gusa ni bo bashyizwe mu myanya.
- Mu kwimurwa kw’abarimu bashakaga guhindura gusa ishuri ariko bagasigara mu karere kamwe, 856 basabye, 498 ni bo bujuje ibisabwa, ariko 383 ni bo bemejwe.
Ibi byerekana uburyo ubushobozi bwo gushyira abarimu mu myanya bugihura n’imbogamizi.
Mu gusoza ibiganiro, inzobere mu by’imiyoborere y’uburezi zatangaje ibyifuzo bigamije kunoza uburyo abarimu bategurwa, bagahabwa amakuru ahagije kandi bagafatwa mu buryo burimo uburinganire:
- Itangwa ry’amakuru ku gihe: REB isabwe gutanga amakuru yihuse ku byemezo n’uko dosiye zitunganywa.
- Gushyira mu gaciro: Gukora igenamigambi rifite ishingiro rigamije guhuza ibikenewe mu mashuri no ku rwego rw’abarimu.
- Kubaka ubushobozi mu cyaro: Gutanga amahugurwa yihariye ku barimu bo mu cyaro kugira ngo haboneke abigisha amasomo akunze kubura.
REB KANDI yanagarutse ku kibazo cy’abarimu bakoze nk’abagenzuzi b’ibizamini by’igihugu, bamwe muri bo bagaragaje ko batarishyurwa. Mu gusubiza iki kibazo, REB yatangaje ko ubwishyu bwatangiye gutangwa kandi ko bose bazishyurwa bitarenze impera z’umwaka wa 2025, hakurikijwe uburyo bw’igenamigambi n’ikoreshwa ry’ingengo y’imari.
Ibipimo bisabwa ku barimu bashaka kwimurwa cyangwa guhanahana (permutation):
- Umwarimu agomba kuba afite konti yemejwe muri TMIS. ✅
- Umwarimu agomba kuba yaragize nibura amanota 70% mu isuzuma ry’imikorere mu mwaka w’amashuri wa 2024/2025.
- Umwarimu agomba kuba yararangije neza imyaka itatu (3) y’akazi ku ishuri rimwe, harimo n’igihe cy’igeragezwa (probation). ✅
- Umwarimu wazamuwe mu ntera azemererwa kwimuka ari uko amaze imyaka itatu (3) ku ishuri rimwe no ku mwanya umwe. ✅
- Umwarimu wigeze kwimurwa cyangwa guhanahanwa (permutation) azemererwa kwimurwa ari uko amaze imyaka itatu (3) kuva yimuwe cyangwa ahanahanyijwe. ✅
- Umwarimu wasabye kwimurwa imbere mu kigo cyangwa guhanahanwa (permutation) ariko ntibikunde, yemerewe gusaba kwimurwa imbere mu kigo cyangwa hanze yacyo. ✅
- Abarimu bahanahana (permutation) bagomba kuba bafite konti zanganya imyirondoro.
- Abarimu batari bemewe (batari certified) basabwa gusaba kwimurwa cyangwa guhanahanwa ari uko barangije amasomo ari kuba (CPD program). ✅
