NESA yatangije amahugurwa ya CAMIS 2.0 ariko sisiteme ikomeje kugaragaza imbogamizi ku bayikoresha bose

Ikigo cy’Igihugu gishinzwe Ibizamini n’Igenzura ry’Amashuri (NESA) cyatangije ku mugaragaro amahugurwa ku bayobozi b’amashuri n’abashinzwe amasomo ku ikoranabuhanga rishya rya CAMIS 2.0 (Comprehensive Assessment Management Information System), sisiteme igamije kuvugurura uburyo amakuru y’abanyeshuri acungwa, uko imitsindire yabo ikurikiranywa n’ukuntu raporo z’amasomo zitunganywa.

N’ubwo iyi sisiteme yitezweho kuvana mu nzira imikorere ya kera yanditse ku mpapuro no kunoza imitangire ya serivisi mu burezi, bamwe mu barimu n’abayobozi b’amashuri baravuga ko itari gukora neza ku bantu bose kandi igihe cyose, bitewe n’imbogamizi zinyuranye zirimo ibibazo bya tekiniki, ubushobozi buke bw’ibikoresho, ndetse n’ubumenyi buke bw’ikoranabuhanga.

NESA ivuga ko izo mbogamizi zizagenda zikemuka binyuze mu mahugurwa arimo gutangwa no mu kunoza sisiteme uko hakenerwa, kugira ngo ihuze n’icyerekezo cy’igihugu cyo guteza imbere ireme ry’uburezi hifashishijwe ikoranabuhanga.

Kuva iyi sisiteme yatangizwa ku mugaragaro ku wa 13 Ugushyingo 2025, NESA yatangaje ko izafasha byinshi byari bikomeje kuba imbogamizi mu mashuri, birimo:

• Kwinjiza amanota mu buryo bwihuse kandi butarimo amakosa

• Gukurikirana imitsindire y’umunyeshuri kuva mu ntangiriro kugeza asoje

• Kubika amakuru mu buryo bwizewe kandi adegajwe mu bubiko bw’ikoranabuhanga

• Gutegura raporo z’amakuru zifite uko zubatse, zidahubukiwe

• Gufasha abayobozi b’amashuri gucunga ireme ry’amasomo

• Gushyigikira inzego z’uburezi mu gufata ibyemezo bishingiye ku makuru atagira amakemwa

Mu magambo magufi, CAMIS 2.0 igamije kurwanya ubusumbane mu makuru, amakosa mu mibare, gutinza raporo no gukoresha uburyo bwa gakondo butajyana n’igihe.
Ibyo byose bigamije kongera umusaruro w’amasomo no guteza imbere imyigire y’abanyeshuri.

Icyiciro cya kabiri: Abarimu bazahugura abandi kuva 01–05 Ukuboza 2025

Iyi nzira yo guhugura “Abahugura bagenzi babo” (Training of Trainers) igamije ko buri kigo gifite ububasha bwo kwigisha abandi nta gutegereza ubuyobozi bukuru.

Aho iyi sisiteme itangiye gukoreshwa, bamwe mu bayikoresha bagaragaje ko hakiri ibibazo byinshi bituma badashobora kuyishingikirizaho burundu.
Abyo bibazo birimo:

• Gutinda gufungura cyangwa kudafunguka na gato

• Gufunga no guhagarara mu gihe hari benshi bayikoresheje icyarimwe

• Kwanga kwinjira (login errors)

• Imikorere itandukanye bitewe n’aho ishuri riherereye

• Kubura internet ihagije mu mashuri yo mu cyaro

• Kubura mudasobwa zihagije mu mashuri

• Abakozi badafite ubumenyi buhagije mu ikoranabuhanga

• Kudasobanukirwa uburyo bushya bwo kwinjiza amakuru

Umwe mu bashinzwe amasomo yagize ati:

“Sisiteme ni nziza ariko iyo abarimu benshi bayifunguye icyarimwe irahagarara NTAGO Irimo gukora.”

Undi mwarimu wo mu cyaro yongeyeho ko hari amasaha “sisiteme irema kwinjira burundu”, bigatera abakozi gutinda.

Nubwo ibibazo byagaragaye, NESA yemeza ko ari ibisanzwe mu gihe sisiteme nshya itangiye gukoreshwa ku rwego rw’igihugu.
Yiyemeje gukora ibi bikurikira:

• Kongera ubushobozi bwa server

• Guhindura ibice bya sisiteme bitari gukora neza

• Gukora imihindurirwe ishingiye ku makuru y’abayikoresha

• Kongera ibihereranye n’ibikoresho no gukwirakwiza internet mu mashuri

• Gutanga ubufasha bwa tekiniki mu buryo buhoraho

• Gukomeza amahugurwa kugeza mu mwaka wa 2026

Ibi byose bigaragaza ko CAMIS 2.0 atari gahunda y’igihe gito, ahubwo ari kimwe mu mishinga y’ingenzi mu kuvugurura uburezi bw’igihugu.

Niba ibibazo byose bizakemuka, CAMIS 2.0 izaba umuyoboro w’ingenzi mu mibereho y’amashuri:

• Gukurikirana umwana mu buryo bwimbitse: uko amanota ye azamuka cyangwa asubira inyuma.

• Gucunga ireme ry’amasomo: umuyobozi amenya niba abarimu bakora inshingano zabo.

• Kumenya icyerekezo cy’amashuri ku rwego rw’igihugu: Minisiteri ikamenya neza ibikenewe mu iterambere ry’uburezi.

• Kugabanya amakosa mu manota: sisiteme irinda “gutakaza amanota” cyangwa kuyahindura mu buryo butemewe.

CAMIS 2.0 ishobora guhindura burundu uko amashuri akora, cyane cyane mu kwinjira mu isi ikoresha amakuru (data-driven education).

Abayobozi n’abarimu benshi baravuga ko sisiteme ari nziza ariko bagasaba ko hakwiye gukorwa byinshi kugira ngo ikorwe neza.

Umuyobozi w’ishuri rimwe yagize ati:

“Iyo yihuse irafasha cyane, ariko haracyari ibibazo byinshi bituma tudashobora kuyishingikirizaho buri gihe.”

Umwarimu wahuguwe mu cyiciro cya mbere we yagize ati:

“Kwimenyera sisiteme biraduhenda ariko nitunganywa neza izadufasha kurushaho kuba abanyamwuga.”

Aya magambo agaragaza ko hafitwe icyizere, gusa hifuzwa ko ibisubizo bitangwa ku gihe.

Sisiteme ya CAMIS 2.0 yinjira mu yindi mishinga igihugu cyashyize imbere, irimo:

• Kwigisha hifashishijwe ikoranabuhanga (e-learning)

• Smart Classrooms

• Kwagura internet mu mashuri

• Gahunda yo guteza imbere ubumenyi bw’ikoranabuhanga ku barimu

Ibi byose bigaragaza ko igihugu gishaka kwagura uburyo bw’imiyoborere y’uburezi bushingiye ku makuru yizewe no ku bumenyi bw’igihe kigezweho.

NESA n’amashuri yose mu gihugu bategereje kureba uko CAMIS 2.0 izitwara mu mezi ari imbere.
Niramutse ikosowe neza kandi ikongerwamo ibikoresho bikenewe, ishobora kuba umugongo w’icungwa ry’imitsindire y’abanyeshuri mu Rwanda.

Gusa, kugira ngo ibyo bigerweho, hakenewe:

• Gukomeza amahugurwa

• Kongera ubushobozi bwa tekiniki mu mashuri

• Gushyigikira abarimu n’abayobozi mu by’ikoranabuhanga

• Gukemura ibibazo by’imikorere ya sisiteme mu buryo bwihuse

Kugeza ubu, abarimu baracyafite icyizere ariko basaba ko sisiteme ivugururwa ikajya ikora neza igihe cyose ku bose.