Umwalimu SACCO Muri Gahunda Nshya yo Kuzamura Ubwizigame: 5% Bugiye Kugera ku 8%

Umwalimu SACCO ikomeje gushyira imbaraga mu gukomeza gutera imbere no kwishakamo ibisubizo birambye, binyuze muri gahunda nshya yo kongera ubwizigame bw’abanyamuryango bayo buva kuri 5% bukagera kuri 8%. Iyi gahunda iri gukorerwa ubukangurambaga mu gihugu hose, ariko by’umwihariko mu Karere ka Burera, aho abahagarariye abarimu mu mirenge batangiye gusura ibigo by’amashuri kugira ngo basobanurire abarimu iby’iyi gahunda, uburemere bwayo ndetse n’akamaro kayo mu gihe kizaza.

Mu Murenge WA Rusarabuye  wo mu Karere ka Burera, umunyamakuru wacu yasanze abahagarariye Umwalimu SACCO basobanurira abarimu uko gahunda nshya izakorwa. Abarimu bamaze gusobanukirwa n’iyi gahunda bahita bahabwa impapuro zo kwiyandikaho no gusinya, kugira ngo igihe gahunda yemejwe ku rwego rw’igihugu, izahite ishyirwa mu bikorwa nta gutinda.

Umwe mu barimu batashatse ko amazina ye atangazwa yatangaje ko basobanuriwe ko impamvu nyamukuru yo kongera ubwizigame ari uko inkunga Leta yahaga Umwalimu SACCO igiye gukurwaho. Byumvikane ko SACCO igomba gushaka uburyo bwihariye bwo gukomeza gutanga serivisi nziza, gukoresha neza umutungo wayo no kwishakamo ibisubizo bidashingiye ku nkunga za Leta.

Yagize ati:
“Batubwiye ko amafaranga Leta yatangaga muri Umwalimu SACCO agiye kvaho bityo ko ari ngombwa ko cooperative ishaka uburyo bwo kwigira. Ni yo mpamvu bashaka ko ubwizigame bwacu buzamuka.”

Nubwo iyi gahunda ifite intego yo kubaka ejo hazaza h’umwalimu, abarimu benshi ntibyayakiriye neza. Hari abifuzaga ahubwo ko ya 5% isanzwe ikatwa ku mushahara ikusanywa nk’ubwizigame yagabanuka cyangwa igakurwaho burundu, kuko bavuga ko kuyikata bidahagije kugira ngo ibe cooperative y’ubucuruzi yihagije ku rwego rwa banki.

Abarimu bamwe baravuga ko Umwalimu SACCO yagombye gushaka abashoramari, aho kugira ngo ikomeze gukata amafaranga ku banyamuryango bayo. Hari n’abagaragaje ko nubwo amafaranga bakatwa yitwa “ubwizigame”, atari amafaranga bafiteho uburenganzira busesuye kuko batayakuraho igihe babishakiye, ahubwo ngo n’iyo bayagujije SACCO iyabaguriza ikayabacaho inyungu, kandi ari bo bayazigamye.

Umwe mu barimu yagize ati:
“Ni gute umuntu yizigamira amafaranga ye, ariko ngo ayagurizwe akayungukira? Nta burenganzira bwuzuye dufite ku bwizigame bwacu, kandi ntitubasha kuyakuraho igihe cyose tubishakiye.”

Abarimu Basabye Ko Ibibazo Byabo Bigezwa Ku Bayobozi Bakuru

Mu biganiro byabereye ku bigo by’amashuri, abarimu baboneyeho umwanya wo gusaba ko ibibazo byabo bikomeye byagezwa ku bayobozi bakuru ba Umwalimu SACCO. Ibibazo byabo bikaba birimo:

1. Abarimu banenze uburyo bwo gusinyira mugenzi wawe nk’umwishingizi, aho bavuga ko iyo uwasinyeho yahindutse “bihemu” agatoroka banki, uwamwishingiye ari we wishyura ideni. Hari n’uwagaragaje ko hari aho umwalimu isanze yishyura ideni ry’umuntu yigeze gusinyira kera.

Basabye ko Umwalimu SACCO yiga uburyo bwo kwikurikirana imyenda ku rwego rw’umukoresha cyangwa ku rwego rw’undi mwishingizi udafitanye ubucuti bwihariye n’uwahisemo kwambura cooperative.

2. Abarimu batandukanye batangaje ko kubona inguzanyo ntoya bitabafasha mu iterambere bitewe n’ibihe igihugu kirimo. Bavuga ko umwarimu uhembwa amafaranga 500,000 Frw atemererwa inguzanyo irenze miliyoni eshatu n’igice, mu gihe banki zisanzwe zishobora kumuha inguzanyo ingana n’ayo ahembwa yikubye inshuro 22.

Bavuze ko amafaranga make batemererwa adashobora no kubafasha kugura amasambu cyangwa gukora ibikorwa binini by’iterambere, ahubwo ko binarangira amafaranga bafashe bayariye igahita atakara nta cyo akoze.

3. Abarimu bifuza ko gahunda y’abishingizi yakurwaho burundu, kuko batanga i mpapuro ko umwishingizi wa mbere ubusanzwe ari “umukoresha” w’umwarimu. Bemeza ko bishoboka kubera ko banki zindi zikurikirana abantu bagerageje kuzambura, SACCO nayo yabishobora idakoresheje abanyamuryango bayo.
4. Abarimu bagaragaje kandi ko hari ikibazo gikomeye mu gutinda kubona amafgaranga kw’abafite konti muri Umwalimu SACCO. Hari aho byagaragaye ko abarimu bahembwa hagapfa iminsi itatu batarabona amafaranga yabo. Byatumaga bamwe bajya kuguza amafaranga mu baturage ku nyungu, bitewe n’ibikenewe by’ako kanya.

Bifuza ko amafaranga menshi bakatwa ajyana na serivisi nziza, cyane cyane izikoresha ikoranabuhanga rigezweho, harimo na serivisi za online.

5. Abarimu banenze ko amakuru menshi akomeye ajya kumenyekana mu itangazamakuru mbere y’uko Umwalimu SACCO ubwayo ayatangaza ku mbuga zayo nkoranyambaga. Basabye ko SACCO yashyiraho uburyo bwo gutangaza amakuru yizewe mbere hose, kugira ngo hirindwe urujijo n’ibihuha.

Urugero rwatanzwe ni urw’inguzanyo y’ubuhinzi yashyizweho igenerwa abarimu bafite imishinga myiza. Kuba batarabimenyeshejwe hakiri kare byatumye amakuru atuzuye akwirakwizwa mbere.

Nk’uko byatangajwe n’ubuyobozi bwa Umwalimu SACCO binyuze kuri Twitter, ubu yiswe X, inguzanyo z’ubuhinzi zirahari ariko zigenerwa abarimu bafite imishinga ifatika kandi igenzuwe neza. BRD izatanga 90% by’amafaranga naho Umwalimu SACCO igatanga 10%. Gusa ngo ni ngombwa ko umwarimu ategura umushinga we neza ukoherezwa muri BRD kugira ngo usuzumwe mbere yo kwemererwa inguzanyo.

Abayobozi basabye abarimu kudatinya iyi gahunda nshya, ahubwo bakayisuzuma neza kuko igamije kubaka ejo hazaza h’imari ya cooperative yabo. Basabye abarimu gusinya ama-list kuko azifashishwa mu gufata imyanzuro ku nzego zo hejuru, ariko na none bemera ko nta mwarimu uzahatirwa kwemera gukatwa 8% hatabanje gukorwa ibiganiro birambuye.

NIBA USHAKA INKURU WAJA UZI KURIKIRA KURI YOUTUBE UNYUZE AHO HASI