CAMIS 2.0: Ejo iratangira Gukoreshwa ku Mugaragaro – Abarimu, DOS naba Head Teachers Basabwa Gukurikiza Ibi

Kuva ejo tariki ya 01/12/2025, Minisiteri y’Uburezi binyuze muri NESA yatangaje ko uburyo bushya bwa CAMIS 2.0 (Competency Assessment Management Information System) bugiye gutangira gukoreshwa ku mugaragaro mu mashuri yose mu gihugu. Ni intambwe ikomeye mu gutuma imicungire y’amanota, uburyo bwo gukurikirana imitsindire y’abanyeshuri n’imikorere y’abarimu biba ibinyamwuga kandi bigezweho kurusha mbere.

Iri koranabuhanga rishya ryitezweho kuzahindura byinshi, cyane cyane ko rihurirana n’igihe cy’ibizamini bisoza igihembwe cya mbere  igihembwe cyatangiye ku itariki ya 08/09/2025. Ni igihe gikomeye mu burezi, aho abarimu, abayobozi b’ibigo n’abanyeshuri baba bategereje umusaruro w’amezi yose yo kwiga no kwigisha.

Impamvu CAMIS 2.0 ari Ingenzi mu Muryango w’Uburezi

NESA yatangaje ko iyi version nshya ya CAMIS 2.0 yateguwe mu rwego rwo kunoza no koroshya imikorere y’abarezi ikaba yunganira gahunda y’igihugu yo kongerera ireme uburezi. Bimwe mu bibazo byagaragaraga muri version ya mbere byari birimo:

• Gutinda gushyira amanota mu ikoranabuhanga
• Kuba hari aho amanota atagaragaraga neza ku banyeshuri n’ababyeyi
• Imbogamizi mu gushyingura neza amakuru y’abanyeshuri
• Uburyo bwo gukurikirana intege nke z’umunyeshuri butari bwihuse
• Kudahuza amakuru hagati y’abarimu n’abayobozi b’ibigo

CAMIS 2.0 iraje gukemura ibi byose, kuko yitezweho gutanga ubushobozi bwagutse, bwihuse, bunonosoye ku buryo nta mwalimu, umuyobozi cyangwa umunyeshuri uzongera gutakaza igihe cyangwa ngo ahure n’urujijo mu mitegurire y’amanota n’impapuro z’ibizamini.

Uburyo Ikoreshwa rya CAMIS 2.0 Rizakorwa

Kuva ejo ku ya 01 Ukuboza 2025, inzego zose z’amashuri ziratangira gukoresha iri koranabuhanga mu buryo bwuzuye. Ni ukuvuga ko:

1. Abayobozi b’amashuri (Head Teachers)

Bazashyiraho mu buryo bwa digitale:

• Amasomo yose yigishwa ku ishuri
• Abarimu bayigisha
• Ibyumba (classes) buri mwalimu ashinzwe

Ibi bizatuma buri mwalimu abasha gutangira akazi ke atabangamiwe n’uburambe mu ikoranabuhanga cyangwa imbogamizi zo guhuza gahunda.

2. Abashinzwe amasomo (DOS/Directors of Studies)

Abo ni bo bazaba bashinzwe kureba ko:

• Amasomo yose yanditswe neza
• Uburenganzira bwa buri mwalimu bwo kwinjira muri CAMIS bwashyizweho neza
• Kwemeza amanota y’abarimu mbere yo koherezwa

Ibi bizafasha mu kugabanya amakosa yabonekaga mbere, aho amanota y’abana yajyaga yinjira nabi cyangwa hakabaho gutinda kuyemeza.

3. Abarimu

Uruhare rw’abarimu muri CAMIS 2.0 ni rwo rukomeye kurusha ibindi byose. Abo ni bo:

• Binjiza amanota y’amasuzumabumenyi yose abana bakoze (Formative assessments)
• Bongeramo amanota y’ibizamini by’igihembwe
• Bakurikirana imitsindire y’abana ku giti cyabo
• Bafasha umuyobozi kubona amakuru y’itsinda (class performance)

Iki ni ikoranabuhanga rishya rije kuborohereza aho abarimu bazajya bishyiriramo amanota mu kanya gato, bagahita babona uburyo buri munyeshuri ahagaze, bityo bifashe mu gufata ibyemezo bishingiye ku bimenyetso (data-driven decisions).

Iri koranabuhanga rishya rigiye kuvugurura byinshi mu burezi bw’u Rwanda. Muri byo twavuga:

1. Kunoza Imicungire y’Amanota

Amanota azaba abitswe mu buryo bwizewe, budapfa kubura cyangwa guhindurwa bidakurikije amategeko. Bizatuma ababyeyi n’abarezi bagira amakuru arimo ukuri.

2. Gukurikirana Umwana ku Giti Cye

Uburyo bushya bufasha umurezi kumenya intege nke z’umwana hakiri kare, kuko imbonerahamwe y’amanota (dashboard) igaragaza ibice byose umwana akennyeho gufashwa.

3. Kunoza Itangazwa ry’Imitsindire

Abanyeshuri bazajya babona amanota yabo hakiri kare, kandi mu buryo bwa digitale. Ibi bizafasha mu guca urujijo rwagiye rugaragara mbere.

4. Kugabanya Akazi kenshi ku Barimu

Abarimu ntibazongera kwandikisha amanota inshuro nyinshi (mu bitabo, mu bipapuro no mu ikoranabuhanga). Ubu byose bizajya binyuzwa muri CAMIS 2.0 gusa.

5. Kubika Amakuru mu buryo bw’Igihe Kirekire

Byorohereza amashuri kubona amakuru y’imyaka yose ishize, agufasha mu igenamigambi no kwitegura ibindi bihembwe.

6. Guhuza Ibyemezo n’Ubumenyi

Abarezi bazajya bafata imyanzuro ishingiye ku mibare (data), bityo bifashe mu kuzamura ireme ry’uburezi.

Ubutumwa ku Barezi, Abanyeshuri n’Ababyeyi

Mu gihe twinjiye mu bihe by’ibizamini byo gusoza igihembwe cya mbere, tubifurije:

• Abarimu: imbaraga mu gukoresha iri koranabuhanga rishya, gukomeza ubunyamwuga no gukorana neza n’abayobozi
• Abanyeshuri: gukora neza ibizamini no gukoresha amahirwe yose yo kwiga no kubaza ibidasobanutse
• Ababyeyi: gukomeza gukurikirana abana no gukorana n’ishuri mu rwego rwo gutanga umusaruro mwiza