Tariki ya 24 Nyakanga 2025, Perezida wa Repubulika Paul Kagame yakoze impinduka mu bagize Guverinoma, hashyirwamo impinduka mu myanya ikomeye y’ubuyobozi, harimo kwinjiza amazina mashya ndetse n’abasanzwe bahawe inshingano nshya.
Impinduka zakozwe zagaragaje abaminisitiri bashya bane barimo ba minisitiri bashya n’abaminisitiri bungirije (State Ministers), bigaragaza imbaraga nshya zije gufasha mu guteza imbere inzego zitandukanye z’igihugu zirimo ibidukikije, ubuhinzi, ibikorwaremezo n’imiyoborere y’inzego z’ibanze.
Amazina mashya yahawe imyanya muri Guverinoma
Nk’uko byatangajwe nibiro byumukuru w’igihugu , Perezida Kagame yashyizeho aba bakurikira:
Dr. Bernadette Arakwiye – yagizwe Minisitiri w’Ibidukikije (Minister of Environment).
Dr. Telesphore Ndabamenye – yagizwe Umunyamabanga wa Leta muri Minisiteri y’Ubuhinzi n’Ubworozi (State Minister in MINAGRI).
Jean de Dieu Uwihanganye – yagizwe Umunyamabanga wa Leta muri Minisiteri y’Ibikorwa Remezo (State Minister in MININFRA).
Dominique Habimana – yagizwe Minisitiri w’Ubutegetsi bw’Igihugu (Minister of Local Government).
Aya mazina mashya agaragaza ko hari intego yo kongerera imbaraga imiyoborere y’igihugu cyane cyane mu nzego zifitanye isano n’imibereho y’abaturage n’imicungire y’umutungo kamere.
Uretse abo kandi hari n’abandi bashyizwe muri Guverinoma harimo :
- Judith Uwizeye – yagizwe Minisitiri muri Perezidansi ya Repubulika (Minister in the Office of the President).
- Inès Mpambara – yagizwe Minisitiri muri Primature (Minister in the Prime Minister’s Office).
Aba bagore bombi basanzwe bazwiho ubunyamwuga n’ubunyangamugayo, ndetse banagize uruhare rukomeye mu miyoborere y’igihugu mu myaka ishize. Ubu bagiye gukorera hafi cyane na Perezida na Minisitiri w’Intebe mu igenamigambi no gukurikirana ishyirwa mu bikorwa rya politiki z’igihugu.
Icyo wamenya kuri aba bayobozi bashya
Dr. Bernadette Arakwiye ni impuguke mu bijyanye n’ibidukikije, akaba asanzwe afite ubunararibonye mu by’imicungire y’umutungo kamere. Yitezweho guhangana n’ibibazo by’imihindagurikire y’ibihe n’ibibazo by’imyuzure bihangayikishije u Rwanda.
Dr. Telesphore Ndabamenye, usanzwe azwi mu bijyanye n’ubuhinzi, yahawe inshingano zo guteza imbere urwego rw’ubuhinzi, rutunze benshi mu baturage. Ashobora kuzazana udushya mu kuzamura umusaruro no kongera ubuhinzi bwunganira inganda.
Jean de Dieu Uwihanganye agarutse muri guverinoma, aho yahawe inshingano mu bikorwa remezo. Azakomeza aho igihugu kimaze kugera mu kubaka imihanda, amazi, amashanyarazi n’itumanaho rigezweho.
Dominique Habimana, ni izina rishya muri politiki, yahawe Minisiteri y’Ubutegetsi bw’Igihugu, inzego z’ibanze zikaba ari moteri y’imiyoborere myiza. Azakurikiranira hafi ibibazo by’abaturage binyuze mu turere n’imirenge.
Impamvu y’izi mpinduka
Izi mpinduka zigaragaza ko Perezida Kagame ahangayikishijwe no kurushaho kunoza imiyoborere, kongera ireme rya serivisi zihabwa abaturage no guharanira iterambere rirambye. Harimo kongerera imbaraga inzego zifite aho zihurira n’imibereho y’abaturage nk’ubuhinzi, ibidukikije n’imiyoborere.
Ikindi kandi, guha inshingano abaminisitiri bashya b’abagore babiri muri Perezidansi na Primature, ni ikimenyetso cy’uko igihugu gikomeje gushyigikira ihame ry’uburinganire mu buyobozi.
Abaturage biteze ko izi mpinduka zizana impinduka mu buryo bugaragara mu buzima bwabo, binyuze mu kunoza serivisi z’imiyoborere y’inzego z’ibanze, kongera umusaruro w’ubuhinzi, guteza imbere ibikorwa remezo bifatika no kurengera ibidukikije.
Perezida Kagame yongeye kugaragaza ko igihugu gikeneye abayobozi bashya bafite ubushake n’ubunyamwuga bwo gukomeza gusigasira ibyagezweho no kwihutisha iterambere. Abashyizwe mu myanya barashishikarizwa gukorana umurava no gushyira imbere inyungu z’abaturage kurusha izindi.