Urubuga rushya rwa TVET rufasha urubyiruko kubona amahirwe y’akazi no kwimenyereza imyuga ( internaship )

Mu rwego rwo gukomeza guteza imbere ireme ry’ubumenyi ngiro mu Rwanda no kongerera urubyiruko amahirwe yo kubona akazi gahuriweho n’ibikenewe ku isoko ry’umurimo, hatangijwe ku mugaragaro urubuga rushya rwa Inserjeune Rwanda/TVET Career Portal. Ni urubuga rw’ikoranabuhanga rwakozwe n’Abanyarwanda mu bufatanye n’Istitut de la Francophonie pour l’Éducation et la Formation (IFEF), rukaba rugamije gufasha abiga imyuga n’ubumenyingiro kubona amakuru, amahirwe yo gukora amahugurwa (internships), ndetse no kubona akazi mu buryo bwihuse kandi buboneye.

Uru rubuga rushya ruboneka kuri kanda hano usure uru rubuga rushya rwa tvet, ni igisubizo gishya gifatika mu rugendo rwo guhuza imyigire n’iterambere ry’igihugu. Muri iki gihe aho ubukungu bushingiye ku bumenyi ngiro bugenda bufata intera, igihugu cy’u Rwanda cyashyize imbaraga mu kwagura amashuri ya TVET, kuyaha ibikoresho, no kwigisha ubumenyi bw’amaboko buhambaye. Nyamara n’ubwo ibyo byose byari byiza, hakenerwaga igikoresho cyihariye gifasha guhuza neza abarangije n’amasosiyete zibakeneye. Aho ni ho Inserjeune Rwanda ihereye.

Iki gikorwa cyatangijwe nyuma y’igerageza (pilote) ryakozwe mu mashuri amwe ya tekiniki (TVET schools) ndetse n’ibigo by’abafatanyabikorwa ndetse bigatanga umusaruro mwiza. Abanyeshuri batsinze igerageza babashije kubona amahugurwa no gukorana n’inganda mu buryo bwihuse, bityo bigaragaza ko iri koranabuhanga rifite ubushobozi bwo guhindura byinshi mu myigishirize n’imyinjirize ku isoko ry’umurimo.

Inserjeune Rwanda/ TVET Career Portal ni urubuga rwubakiye ku ngamba zigiye zitandukanye zigamije gufasha urubyiruko, abarimu, ibigo byigisha imyuga, ndetse n’abatanga akazi. Rubafasha mu buryo bukurikira:

1. Guhuza ubumenyi bw’amasomo n’icyo isoko rikenera

Isoko ry’umurimo rigenda rihindagurika; ibyo inganda zikenera uyu munsi si byo zikenera ejo hazaza. Urubuga rufasha Abayobozi b’amasomo, abarezi na TVET Schools kumenya neza ubumenyi inganda zikeneye, bityo bakagena gahunda y’amasomo ihuye n’ibihe bihari. Ibi bituma umunyeshuri urangije aba yujuje ibyo isoko ry’umurimo rikenera muri ako kanya.

2. Korohereza abanyeshuri kubona amahugurwa (internships)

Amahugurwa ni ngombwa mu myigire ya TVET, kuko ni ho ubumenyi bw’amaboko bwubaka ubushobozi nyabwo bw’umunyeshuri. Gusa akenshi kubona aho umuntu akora amahugurwa byabaga ikibazo gikomeye. Uru rubuga rero rufasha umunyeshuri gusaba amahugurwa, kubona amakuru y’ibigo biyatanga, ndetse no gukurikirana uko asabwa, byose mu buryo bwihutirwa kandi bworoshye.

3. Korohereza abarangije kubona akazi

Nubwo urubyiruko rwinshi rwiga imyuga ruba rufite impano n’ubumenyi buhambaye, akenshi kubona akazi byabaga ikibazo kubera kutamenya aho bakenewe. Uru rubuga rutanga amahirwe yo kubona akazi katandukanye mu bigo bikora ubucuruzi, inganda, ibigo bya leta, ndetse n’ibigo byigenga. Ikigo gikeneye umukozi nacyo gishobora kureba umwirondoro w’abarangije (CVs) mu buryo bworoshye, bityo kigahita kimenya uhuye neza n’umwanya ufite.

4. Gufasha ibigo bitanga akazi kubona impuguke mu buryo bwihuse

Imwe mu mbogamizi abatanga akazi bagiraga ni ugutinda kubona abakozi bafite ubumenyi ngiro runaka. Uru rubuga rukemura iki kibazo kuko rutangira amakuru yose ku banyeshuri barangije baba babishoboye. Ibi bituma ibigo by’inganda bibona impuguke zihamye mu masaha make.

5. Kuzamura umusaruro n’imikorere y’inganda

Nta shuri ryiza nko gutanga akazi impuguke zifite ubumenyi buboneye. Uru rubuga rufasha inganda kubona abakozi bafite ubushobozi bukwiye, bityo zikongera umusaruro, zikagabanya imyigishirize ya nyuma yo guha akazi, ndetse zikagera ku ntego zazo mu gihe gito.

U Rwanda rukomeje gushyira imbere uburezi bufite ireme, kandi rugafasha urubyiruko kwinjira ku isoko ry’umurimo bifatikanye. Inserjeune Rwanda rero ni kimwe mu bikorwa bigaragaza guhanga udushya mu guhanga ibisubizo by’Abanyarwanda, ku bibazo by’Abanyarwanda. Ikoranabuhanga nk’iri rigaragaza uburyo igihugu cyiyemeje kugira uburezi bunoze bufasha iterambere ry’ubikorwa remezo, inganda, ubuhinzi bushingiye ku ikoranabuhanga, n’izindi nzego z’ubukungu.

Mu rwego rw’ubumenyi ngiro, urebye uko TVET yakomeje kwaguka mu myaka ishize, usanga uru rubuga ruzafasha cyane mu kwimakaza politiki yo kugira abaturage bafite ubumenyi ngiro bwo guhanga udushya no kwihangira imirimo. Si urubyiruko gusa ruzabyungukiramo, ahubwo n’abikorera n’inganda bizabona umusaruro ufatika.

Hari benshi mu banyeshuri bari bararangije amashuri ya TVET badafite amakuru ahagije ku mahirwe abategereje. Uru rubuga rubahindurira ibintu byinshi:

• Barabona amakuru ajyanye n’akazi mu buryo bwihuse,
• Bashobora gukora CV zabo no kuzishyira ku rubuga kugira ngo ziboneke n’abakoresha,
• Bashobora kumenya ibigo bitanga amahugurwa no gusaba umwanya mu buryo bworoshye,
• Bashobora kumenya amakuru agezweho ku isoko ry’umurimo.

Ibi byose bituma umunyeshuri cyangwa uwamaze kurangiza ahorana icyizere cy’ejo heza, kuko ahabwa uburyo bworoshye bwo guhuza ubumenyi bwe n’ibikenewe ku isoko.

Inganda n’ibigo by’ubucuruzi bifite amahirwe yo gutanga amahugurwa, gutoza abanyeshuri, no guhita bibahindura abakozi mu gihe habayeho guhuzwa neza. Ubu bufatanye bufasha kongera ireme ry’uburezi, kuko umunyeshuri ahabwa amahirwe yo kwiga ibintu bifatika bikoreshwa ku kazi. Aho kwiga ibintu by’inyandiko gusa, urubyiruko rwinjira mu nganda rukahiga, rukorera amasoko nyayo y’ubucuruzi.